ទេយ្យទានសម្តេចតេជោ និងសម្តេចកិត្តិព្រឹទ្ធបណ្ឌិត តាមរយៈឧកញ៉ា បណ្ឌិត ទ្រី ភាព និងលោកជំទាវ ឧកញ៉ា គៀន ស្រីនាង ត្រូវបានប្រគេនវត្តចំនួន៥ ក្នុងខេត្តពោធិ៍សាត់

 

(ខេត្តពោធិ៍សាត់)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈលោកឧកញ៉ា ទ្រី ភាព និងលោកជំទាវឧកញ៉ា គៀន ស្រីនាង បានប្រគេនទេយ្យទានជាគ្រឿងឧបភោគ បរិភោគទៅដល់វត្តចំនួន៥ នៅក្នុងស្រុកក្រវ៉ាញ និងស្រុកវាលវែង ខេត្តពោធិ៍សាត់។

ទេយ្យទានទាំងនេះ ត្រូវបានក្រុមការងាររបស់លោកឧកញ៉ា ទ្រី ភាព និងលោកជំទាវឧកញ៉ា គៀន ស្រីនាង យកទៅប្រគេនព្រះសង្ឃទាំង៥វត្ត នៅថ្ងៃទី២៥ ខែមីនា ឆ្នាំ២០២១នេះ។

ក្រុមការងារបានបញ្ជាក់ថា ទេយ្យទានទាំងនេះកើតចេញពីសទ្ធាជ្រះថ្លារបស់លោកឧកញ៉ា និងលោកជំទាវឧកញ៉ា និងដើម្បីចូលរួមជាមួយសម្តេចតេជោ និងសម្តេចកិត្តិព្រឹទ្ធបណ្ឌិត ដោះស្រាយការខ្វះខាតរបស់ព្រះសង្ឃតាមទីអារាម ក្នុងពេលពេលប្រទេសជាតិជួបការលំបាកដោយសារការរាតត្បាតជំងឺកូវីដ១៩។

ក្នុងឱកាសនាំទេយ្យទានប្រគេនព្រះសង្ឃតាមទីអារាមនេះ ក្រុមការងារក៏បានរំលឹកពីអនុសាសន៍ណែនាំរបស់សម្តេចតេជោ ដែលបានឱ្យតាមទីអារាមទូងស្គរ វាយរគាំង ដើម្បីជាសាររំលឹកប្រជាពលរដ្ឋចូលរួមប្រយុទ្ធប្រឆាំងជំងឺកូវីដ១៩ ក៏ដូចជាការសូត្រធម៌នានា ដើម្បីឱ្យកម្ពុជាបានរួចផុតពីគ្រោះកាចនៃការឆ្លងរាលដាលមេរោគកូវីដ១៩។

ក្រុមការងារក៏បានសំណូមពរព្រះសង្ឃជួយផ្សព្វផ្សាយជូនប្រជាពលរដ្ឋឱ្យចូលរួមអនុវត្តន៍វិធានសុខាភិបាលឱ្យបានម៉ត់ចត់។ ជាពិសេសអនុសាសន៍សម្តេចតេជោ «៣ការពារ និង៣កុំ»

ទេយ្យទានដែលបានយកទៅប្រគេនព្រះសង្ឃក្នុងមួយវត្តៗទទួលបាន៖ អង្ករ ២០០គីឡូក្រាម, មី ២០កេះ, ត្រីខ ១០កេះធំ, ម៉ាស់ ១.២៥០ម៉ាស់, ថ្នាំវីតាមីនសេ ១០ទីប, ទឹកអាល់កុល និងដបលាងដៃ (ដបតូច) ៣០ដប, ទឹកត្រីនិងទឹកស៊ីអ៉ីវ ២០យួរ និងបច្ច័យ ១,០០០,០០០រៀល។

សូមបញ្ជាក់ផងដែរថា ក្រុមការងារនឹងបន្តនាំយកទេយ្យទានទាំងនេះទៅ ប្រគេនព្រះសង្ឃកំពុងជួបការលំបាក ដែលគង់នៅវត្តផ្សេងៗជាបន្តទៀត៕

(សូមអានបន្ត)

សម្ដេចតេជោ ហ៊ុន សែន សម្រេចឲ្យរដ្ឋបាលខេត្តកំពង់ចាម យកសណ្ឋាគារមេគង្គ ធ្វើជាមន្ទីរពេទ្យសម្រាប់ព្យាបាលអ្នកកើតជំងឺកូវីដ នៅខេត្តកំពង់ចាម និងត្បូងឃ្មុំ

(កំពង់ចាម)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសម្រេចឲ្យរដ្ឋបាលខេត្តកំពង់ចាម យកសណ្ឋាគារមេគង្គ ធ្វើជាមន្ទីរពេទ្យសម្រាប់ព្យាបាលអ្នកកើតជំងឺកូវីដ-១៩ រស់នៅខេត្តកំពង់ចាម និងខេត្តត្បូងឃ្មុំ។

បន្ទាប់ពីទទួលបានការណែនាំពីសម្ដេចតេជោ ហ៊ុន សែន, លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំង នឹងជំងឺកូវីដ-១៩ខេត្ត នៅព្រឹកថ្ងៃទី២៥ ខែមីនា ឆ្នាំ២០២១នេះ បានដឹកនាំកិច្ចប្រជុំបន្ទាន់ ជាមួយថ្នាក់ដឹកនាំខេត្ត ដើម្បីរៀបចំមន្ទីរពេទ្យសម្រាប់ព្យាបាល អ្នកជំងឺកូវីដ-១៩ និងរៀបចំទីតាំងសម្រាប់ចាក់វ៉ាក់សាំងកូវីដ-១៩ ជូនដល់ប្រជាពលរដ្ឋនៅក្នុងខេត្តកំពង់ចាម។

គួរជម្រាបថា កន្លងមកសណ្ឋាគារមេគង្គ ត្រូវបានប្រើប្រាស់ជាមណ្ឌលចត្តាឡីស័ក ប៉ុន្ដែនៅពេលនេះក៏ត្រូវប្រើប្រាស់ជាកន្លែងសម្រាប់ព្យាបាលអ្នកកើតជំងឺកូវីដ-១៩វិញ ដោយឡែកចំពោះអ្នកដែលកំពុងធ្វើចត្តាឡីស័កនៅសណ្ឋាគារមេគង្គ ត្រូវយកទៅធ្វើចត្តាឡីស័កបន្ត នៅឯសាលាគរុកោសល្យភូមិភាគកំពង់ចាម។

ក្នុងកិច្ចប្រជុំនោះ លោក អ៊ុន ចាន់ដា បានលើកឡើងថា សម្រាប់ប្រជាពលរដ្ឋដែលត្រូវទទួលការចាក់វ៉ាក់សាំង បង្ការជំងឺកូវីដ-១៩ នាពេលខាងមុខ រដ្ឋបាលខេត្តកំពង់ចាម សម្រេចយកទីតាំងសាលាខេត្តកំពង់ចាម ជាកន្លែងផ្ដល់ការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋដោយឥតគិតថ្លៃ៕

(សូមអានបន្ត)

ឃាត់ខ្លួនមេល្បែងឆ្នោតខុសច្បាប់ម្នាក់ នៅខណ្ឌឫស្សីកែវ

 (ភ្នំពេញ)៖ គណៈបញ្ជាការឯកភាពខណ្ឌឫស្សីកែវ បានសម្រេចឃាត់ខ្លួនមេល្បែងមួយរូប និងបិទទីតាំងបណ្ដោះអាសន្នមួយកន្លែង បន្ទាប់ពីប្រតិបត្តិការស្រាវជ្រាវរកឃើញលួចបង្កប់បើកល្បែង (ឆ្នោតវៀតណាម) ខុសច្បាប់។

បើតាមការបញ្ជាក់របស់លោកអភិបាលខណ្ឌឫស្សីកែវ ជា ពិសី និងជាប្រធានគណៈបញ្ជាការឯកភាពខណ្ឌ ចំពោះការសម្រេចឃាត់ខ្លួនមេល្បែងមួយរូប និងបិទទីតាំងបណ្ដោះអាសន្នមួយកន្លែងនេះ ដឹកនាំផ្ទាល់ដោយលោក លីន ញ៉ក់ អភិបាលរងខណ្ឌ និងបានអនុវត្តឡើងស្ថិតនៅចំណុច (ផ្សារសាំហាន់) តូបលេខB6 ផ្លូវលេខ១០៥ ក្រុមទី៥ ភូមិបាក់ទូក សង្កាត់ទួលសង្កែទី១ នាថ្ងៃទី២៤ ខែមីនា ឆ្នាំ២០២១។

លោក លីន ញ៉ក់ អភិបាលរងខណ្ឌឫស្សីកែវ បញ្ជាក់ថា នៅក្នុងរង្វង់ប្រតិបត្តិការបង្ក្រាបល្បែងឆ្នោតវៀតណាមនេះ ក្រៅពីឃាត់ខ្លួនមេល្បែងម្នាក់ ទៅធ្វើកិច្ចសន្យាបញ្ឈប់រាល់សកម្មភាព និងបិទទីតាំងបណ្ដោះអាសន្ន, កម្លាំងអាជ្ញាធរ រកពុំឃើញមានអ្នកចូលទៅចាក់ឆ្នោតឡើយ ដោយដកហូតបានវត្ថុតាងពាក់ព័ន្ធមួយចំនួន រួមមាន៖ តុ, កៅអី, ក្តាខៀន សំរាប់កត់លេខឆ្នោត និងស្លាកឡូហ្គោមួយចំនួន ដើម្បីទប់រាល់បទល្មើសចោរកម្មផ្សេងៗ៕

(សូមអានបន្ត)

អភិបាលខេត្តប៉ៃលិន ចុះពិនិត្យមើលសណ្តាប់ធ្នាប់ និងការត្រៀមសាងសង់អគារថ្មីបន្ថែម នៅផ្សារប៉ាហ៊ីផ្នែកខាងលើ

ប៉ៃលិន៖ ថ្ងៃទី២៤ ខែមីនា ឆ្នាំ២០២១ លោកជំទាវ បាន ស្រីមុំ អភិបាលខេត្តប៉ៃលិន អមដំណើរដោយអភិបាលរងខេត្ត ថ្នាក់ដឹកនាំមន្ទីរអង្គភាពជំនាញពាក់ព័ន្ធជុំវិញខេត្ត និងអាជ្ញាធរមូលដ្ឋាន ព្រមទាំងក្រុមការងារ បានអញ្ជើញចុះពិនិត្យមើល សណ្តាប់ធ្នាប់ និងការត្រៀមសាងសង់អគារថ្មីបន្ថែម នៅផ្សារសាមគ្គី ហៅផ្សារ ប៉ាហ៊ី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ដើម្បីបង្កលក្ខណៈ ងាយស្រួល ដល់បងប្អូនអាជីវករក្នុងការលក់ដូរ ប្រកបដោយរបៀបរៀបរយ និងមានសោភ័ណភាពល្អ។

លោកជំទាវ បាន ស្រីមុំ អភិបាលខេត្តប៉ៃលិន បានមានប្រសាសន៍ លើកឡើងថា៖ ដោយសារបងប្អូនអាជីវករនៅផ្សារប៉ាហ៊ី ផ្នែកខាងលើមិនទាន់មានកន្លែង លក់ដូរត្រឹមត្រូវ ដូច្នេះគណៈកម្មការផ្សារ ត្រូវសហការជាមួយមន្ត្រីជំនាញ សិក្សាគម្រោងប្លង់​​ឱ្យបាន​​ច្បាស់​​លាស់តាមស្តងដារ បច្ចេកទេស ដើម្បីសាងសង់អគារផ្សារថ្មីប្រកបដោយសោភ័ណភាពទាក់ទាញ និងមានគុណ​​ភាពខ្ពស់ ដែលធានាដល់ការប្រើប្រាស់បានយូរអង្វែង ជាពិសេសត្រូវមានកន្លែងជ្រកម្លប់ និងមានចំណត​​រថយន្តត្រឹមមត្រូវ។

លោកជំទាវអភិបាលខេត្ត បានមានប្រសាសន៍ជំរុញដល់គណៈកម្មការផ្សារ ត្រូវរៀបចំសណ្តាប់ធ្នាប់ផ្សារឱ្យបានល្អមាន​​អនាម័យ ចៀសវាងការលក់ដូររំលោភ លើចំណីផ្លូវ ដែលបង្កឱ្យស្ទះចរាចរណ៍ និងបាត់បង់សោភ័ណភាពផ្សារ តែមិនត្រូវយកភាស៊ីពីបងប្អូនដែលលក់ដូរបន្លែបង្ការ ត្រីសាច់តិចតួចតាមកញ្ច្រែង នោះឡើយ ។

នៅក្នុងឱកាសនោះផងដែរ លោកជំទាវ បាន ស្រីមុំ បានផ្តាំផ្ញើដល់បងប្អូនប្រជាពលរដ្ឋ និងអាជីវករទាំងអស់ ត្រូវរួមគ្នាទ​ប់ស្កាត់​កា​​រចម្លង​​រីករាលដាលនៃជំងឺកូវីដ-១៩ ដោយអនុវត្តន៍ ៣កុំ និង៣ការពារជានិច្ច ហើយចំពោះបងប្អូន​​ពលករដែល​​ទើបត្រឡប់មកពីក្រៅប្រទេស និងមកពីបណ្តារាជធានីខេត្តនានា ត្រូវធ្វើចត្តាឡីស័កនៅដាច់ដោយឡែ​​កពីសាច់ញាតិក្រុម​​គ្រួសារ និងមិត្តភ័ក្តិរយ:ពេល ១៤ថ្ងៃសិន៕

(សូមអានបន្ត)

ក្រសួងសុខាភិបាល៖ រាជធានី ខេត្ត ចំនួន ៥ ជាគោលដៅភូមិសាស្ត្រ ដែលត្រូវអនុវត្តកាតព្វកិច្ចពាក់ម៉ាស និងរក្សាគម្លាតបុគ្គល !

សៀមរាប៖ ខេត្តសៀមរាប និងរាជធានី-ខេត្តចំនួន៤ទៀត ត្រូវអនុវត្តន៍កាតព្វកិច្ចពាក់ម៉ាស និងរក្សាគម្លាតបុគ្គល ក្នុងដំណាក់កាលនៃការរីករាលដាលជំងឺកូវីដ-១៩ ជាពិសេសព្រឹត្តិការណ៍សហគមន៍កុម្ភ: !...…

ក្រសួងសុខាភិបាល នៅថ្ងៃទី២៤ ខែមីនា ឆ្នាំ២០២១នេះ បានជូនដំណឹង ស្តីពីការកំណត់យកខេត្តសៀមរាប, រាជធានីភ្នំពេញ, ខេត្តព្រះសីហនុ, ខេត្តកណ្ដាល និងខេត្តព្រៃវែង ជាភូមិសាស្ត្រត្រូវមានកាតព្វកិច្ចពាក់ម៉ាស និងរក្សាគម្លាតបុគ្គល អំឡុងពេល នៃការរាលដាលជំងឺកូវីដ-១៩ ដែលជាព្រឹត្តិការណ៍សហគមន៍ ២០កុម្ភ:។

សេចក្ដីជូនដំណឺងនេះ ជម្រាបដល់អាជ្ញាធរគ្រប់លំដាប់ និងប្រជាពលរដ្ឋ នៃរាជធានី-ខេត្តទាំង៥ ត្រូវចូលរួមអនុវត្តន៍កាតព្វកិច្ចនេះ ដូចដែលបានកំណត់ក្នុងប្រកាសរបស់ក្រសួងសុខាភិបាល ស្ដីពីកាតព្វកិច្ចពាក់ម៉ាស និងរក្សាគម្លាតបុគ្គល អំឡុងពេលនៃការរាលដាលជំងឺកូវីដ-១៩ ក្នុងសហគមន៍ ស្របតាមអនុក្រឹត្យរបស់រាជរដ្ឋាភិបាល ស្ដីពីវិធានការសុខាភិបាល ដើម្បីបង្ការ ទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរ់ផ្សេងទៀត។

ជាមួយនោះ ក្រសួងសុខាភិបាល ក៏បានអំពាវនាវ ដល់អាជ្ញាធរគ្រប់លំដាប់ថ្នាក់ត្រូវចាត់វិធានការឱ្យបានតឹងរឹងបំផុត ក្នុងការធានានូវការអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពនេះ ឲ្យបានខ្ជាប់ខ្ជួន និងម៉ឺងម៉ាត់ ដើម្បីសុខមាលភាពប្រជាពលរដ្ឋ និងសង្គមជាតិ រហូតដល់មានការជូនដំណឹងជាថ្មី។

សូមជម្រាបជូនថា សេចក្តីជូនដំណឹងនេះ ត្រូវតាមអនុលោមជាមួយទៅនឹងច្បាប់ ស្ដីពីវិធានការទប់ស្កាត់ការឆ្លងរីករាលដាលនៃជំងឺកូវីត-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងប្រកាសលេខ ០៨១ ស.នក ប្រក ស្ដីពីកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពក្នុងអំឡុងពេល នៃការឆ្លងរាលដាលជំងឺកូវីដ-១៩ ក្នុងសហគមន៍៕ ដោយ៖ មន្ទីរព័ត៌មានខេត្តសៀមរាប សម្រួលផ្សាយដោយ៖ ធូ កុសល

(សូមអានបន្ត)

រថយន្តម៉ាស្តាបុកហ៊ីណូពីក្រោយ បណ្តាលឲ្យរងការខូចខាត កំណាត់មុខយ៉ាងដំណំ

 

ភ្នំពេញ: រថយន្តម៉ាស្តាបុកហ៊ីណូពីក្រោយ ខូចខាតកំណាត់មុខយ៉ាងដំណំ បង្កឱ្យមានការភ្ញាក់ផ្អើលកើតឡើង កាលពីវេលាម៉ោង៣និង៣០នាទីរសៀល ថ្ងៃទី២៣ ខែមីនា ឆ្នាំ២០២១ នៅលើស្ពានជ្រោយចង្វា ក្នុងភូមិដើមគ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។

រថយន្តម៉ាស្តា ពណ៌ទឹកប្រាក់ ពាក់ផ្លាកលេខភ្នំពេញ 2AA 4719 បើកដោយបុរសម្នាក់ ។ ចំណែករថយន្ត១គ្រឿងទៀតម៉ាក ហ៊ីណូ ពណ៌ស ពាក់ផ្លាកលេខភ្នំពេញ 2BD 2136 បើកដោយបុរសម្នាក់ ។

តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ រថយន្តទាំងពីរគ្រឿង បានបើកឡើងស្ពានជ្រោយចង្វា ទិសដៅពីលិចទៅកើត ដោយរថយន្តហ៊ីណូ បើកខាងមុខរថយន្តម៉ាស្តា បើកពីក្រោយ លុះមកដល់ចំណុចកើតហេតុ ស្រាប់តែរថយន្តម៉ាស្តា មិនបានរក្សាគម្លាតឱ្យសមល្មម ក៏ជ្រុលទៅបុករថយន្តហ៊ីណូពីក្រោយ បណ្តាលឱ្យខូចខាតកំណាត់មុខ របស់រថយន្តម៉ាស្តាខ្លួនឯងយ៉ាងដំណំ ។

ក្រោយពេលកើតហេតុ ដោយភាគីខាងរថយន្តហ៊ីណូ រងការខូចខាតតិចតួច ពួកគេក៏ដោះស្រាយគ្នាបញ្ចប់រឿង នៅនឹងកន្លែង រីឯភាគីរថយន្តម៉ាស្តា ក៏យកទៅជួសជុលដោយខ្លួនឯង ៕

      

(សូមអានបន្ត)

រកឃើញមនុស្ស៤នាក់កើតជំងឺកូវីដ-១៩ នៅហាងកែសម្ពស្ស Master Care Cambodia ខណ្ឌបឹងកេងកង, ម្នាក់ជាស្ដ្រីមានផ្ទៃពោះជាង ៧ខែ

(ភ្នំពេញ)៖ នៅរសៀលថ្ងៃទី២២ ខែមីនា ឆ្នាំ២០២១នេះ បណ្ដាញព័ត៌មាន Fresh News ទទួលបានសេចក្ដីរាយការណ៍ថា មានមនុស្ស៤នាក់ កើតជំងឺកូវីដ-១៩ នៅហាងអ្នកឯកទេសរក្សាសម្រស់ Master Care Cambodia ដែលមានទីតាំងនៅខណ្ឌបឹងកេងកង រាជធានីភ្នំពេញ។

អាជ្ញាធរមូលដ្ឋាន និងមន្ដ្រីសុខាភិបាលបានអះអាងថា នៅពេលនេះឡានពេទ្យបានទៅយកមនុស្សទាំង៤នាក់នោះហើយ ដើម្បីទៅសម្រាកព្យាបាល នៅសណ្ឋាគារ The Great Duke។ ក្នុងចំណោមអ្នកឆ្លងជំងឺកូវីដ-១៩ ទាំង៤នាក់នោះ មានម្នាក់ជាស្ដ្រីមានផ្ទៃពោះ៧ខែ។

រហូតមកដល់ពេលនេះ ទីតាំងហាង Master Care Cambodia ត្រូវបានផ្អាកអាជីវកម្ម និងបិទទ្វារជាបណ្ដោះអាសន្ន។

សូមជម្រាបថា គិតត្រឹមម៉ោង៧៖០០នាទីព្រឹក ថ្ងៃទី២២ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ១,៧៥៣នាក់ ក្នុងនោះអ្នកជាសះស្បើយចំនួន ៩៦៧នាក់, អ្នកកំពុងសម្រាកព្យាបាលជំងឺ ចំនួន៧៨១នាក់, ស្លាប់ចំនួន៤នាក់៕

(សូមអានបន្ត)

ក្រសួងសុខាភិបាល រកឃើញករណីវិជ្ជមានវីរុសកូវីដ-១៩ថ្មី ចំនួន៥៨នាក់ និងជាសះស្បើយ ១៥នាក់

 

 (ភ្នំពេញ)៖ ក្រសួងសុខាភិបាល នាព្រឹកថ្ងៃទី២១ ខែមីនា ឆ្នាំ២០២១នេះ បានចេញសេចក្តីជូនព័ត៌មានថា មានករណីវិជ្ជមានកូវីដ-១៩ថ្មីចំនួន៥៤៨នាក់ និងមានអ្នកជាសះស្បើយ ១៥នាក់។

គួរបញ្ជាក់ផងដែរថា ករណីវិជ្ជមានថ្មីខាងលើនេះ មាន៥៧នាក់ ជាអ្នកជាប់ទាក់ទងនឹង «ព្រឹត្តិការណ៍សហគមន៍២០កុម្ភៈ» និងម្នាក់ទៀតជាស្ត្រីជនជាតិចិន ដែលធ្វើដំណើរមកពីប្រទេសចិន

ដោយឡែក ករណីជាសះស្បើយនាថ្ងៃនេះ សុទ្ធតែជាអ្នក ជាប់ទាក់ទងនឹង «ព្រឹត្តិការណ៍សហគមន៍២០កុម្ភៈ»។

តាមក្រសួងសុខាភិបាល រហូតមកដល់ពេលនេះ បានរកឃើញអ្នកឆ្លងវីរុសកូវីដ១៩សរុប ១៦៩០ករណី ក្នុងនោះអ្នកជំងឺ៩៥០នាក់ បានជាសះស្បើយ និងមានអ្នកស្លាប់បីនាក់។

ជាមួយគ្នានោះ «ព្រឹត្តិការណ៍សហគមន៍២០កុម្ភៈ» ក្រសួងសុខាភិបាល បានរកឃើញករណីឆ្លងថ្មីកើនដល់ ១១៧២នាក់ ក្នុងនោះមានអ្នកជាសះស្បើយ៤៤៦នាក់ផងដែរ៕

(សូមអានបន្ត)

សម្ដេចតេជោនាយករដ្ឋមន្ត្រី អញ្ជើញពិនិត្យការរៀបចំទីតាំងមណ្ឌលព្យាបាល ជំងឺកូវីដ-១៩ នៅមន្ទីរពេទ្យស្ត្រី នគរទេព ក្នុងខណ្ឌដង្កោ

 

 ភ្នំពេញ: ថ្ងៃទី១៩ ខែមីនា ឆ្នាំ២០២១  សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញពិនិត្យ ការរៀបចំទីតាំងមណ្ឌលព្យាបាលជំងឺកូវីដ-១៩ នៅមន្ទីរពេទ្យស្ត្រី នគរទេព ស្ថិតក្នុងខណ្ឌដង្កោ រាជធានីភ្នំពេញ នាព្រឹកថ្ងៃទី១៩ ខែមីនា ឆ្នាំ២០២១ ។

រូបថត៖ កុក គី

(សូមអានបន្ត)