កម្លាំងការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ បានបេីកប្រតិបត្តិការ

(ភ្នំពេញ)៖ កម្លាំងការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ បានបេីកប្រតិបត្តិការបង្ក្រាបករណីចាប់ជំរិតជនជាតិចិន ដែលបង្កដោយជនជាតិចិនដូចគ្នាមួយករណី នៅខណ្ឌចំការមន ក្រោយទទួលពាក្យបណ្ដឹងបាន៦ម៉ោង។

លោកវរសេនីយ៍ឯក ខេង ម៉េងឈាង នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងនៅថ្ងៃទី២៧ ខែសីហា ឆ្នាំ២០២០នេះថា ប្រតិបត្តិការនេះធ្វេីឡេីង នៅវេលាម៉ោងជាង៣រសៀល ថ្ងៃទី២៥ ខែសីហា ក្រោយទទួលបានពាក្យបណ្ដឹងនៅវេលាម៉ោង៩ព្រឹក ចំណុចខុនដូរមួយកន្លែងក្នុងសង្កាត់ទន្លេបាសាក់ ខណ្ឌចំការមន។

ក្រោយទទួលបានពាក្យបណ្ដឹង និងមានបញ្ជាពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៉ិន បូរ៉ា អគ្គស្នងការរងទទួលផែន និងមានការចង្អុលបង្ហាញពី ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, កម្លាំងជំនាញនាយកដ្ឋានដឹកនាំដោយអនុប្រធានាយកដ្ឋានពីររូប ស្រាវជ្រាវបង្ក្រាបបានតែម្ដង។

លោកវរសេនីយ៍ឯក ខេង ម៉េងឈាង បានបញ្ជាក់ថា ជាលទ្ធផល កម្លាំងជំនាញនាយកដ្ឋាន បានឈានដល់ការឃាត់ខ្លួនជនសង្ស័យចំនួន០៦នាក់ ទី១៖ឈ្មោះ TU JIAXIN អាយុ២៦ឆ្នាំ, ទី២៖ឈ្មោះ YANG CHUNPING អាយុ៣០ឆ្នាំ, ទី៣៖ឈ្មោះ LI ZHIWEI អាយុ២៦ឆ្នាំ, ទី៤៖ឈ្មោះ XU YONGJUN អាយុ៣១ឆ្នាំ, ទី៥៖ឈ្មោះ XU HUICHENG អាយុ២៨ឆ្នាំ និងទី៦៖ឈ្មោះ LIAO XIANMIN អាយុ២៤ឆ្នាំ។

ក្នុងប្រតិបត្តិការនេះ សមត្ថកិច្ចដកហូតបាន រថយន្ត០១គ្រឿង ម៉ាក Rang Rover ពណ៌ខ្មៅ ផលិតឆ្នាំ២០១៩ ពាក់ផ្លាកលេខភ្នំពេញ2AN-8228 និងលិខិតឆ្លងដែនចំនួន០៨ក្បាល និងសំភារះពាក់ពន្ធមួយចំនួន ។

ឆ្លងតាមការសាកសួរ ជនសង្ស័យចំនួន០៦នាក់ខាងលើបានសារភាពថា ពួកខ្លួនពិតជាបាន បង្ខាំងមនុស្សដោយខុសច្បាប់ និងជំរិតទារប្រាក់ ពីជនរងគ្រោះឈ្មោះ ZHOU NA ភេទស្រី អាយុ២៥ឆ្នាំ កាន់លិខិតឆ្លងដែនលេខ E០០៥៥៤០៣៩ ពិតប្រាកដមែន។

បច្ចុប្បន្ន នាយកដ្ឋាននគរបាលព្រហ្មទណ្ឌ បានកសាងសំណុំរឿង និងបញ្ជូនជនសង្ស័យ ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីបន្ត៕

(សូមអានបន្ត)

សមត្ថកិច្ចចុះបង្ក្រាបទីតាំងស្ដុកគ្រឿងសម្អាងខុសច្បាប់ ជាង១០តោន នៅខណ្ឌបឹងកេងកង

(ភ្នំពេញ)៖ កម្លាំងនាយកដ្ឋានប្រឆាំងបទល្មើសសេដ្ឋកិច្ច សហការជាមួយកម្លាំងអធិការដ្ឋាននគរបាលខណ្ឌបឹងកេងកង នៅរសៀលថ្ងៃទី០៤ ខែសីហា ឆ្នាំ២០២០នេះ បានចុះបង្ក្រាបទីតាំងស្ដុក និងចែកចាយគ្រឿងសម្អាងរំលោភកម្មសិទ្ធិបញ្ញា និងខុសច្បាប់មួយកន្លែង ស្ថិតក្នុងក្រុមទី២៤ ភូមិ០៣ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

សមត្ថកិច្ចបានឲ្យដឹងថា ដោយមានការអនុញ្ញាតពីលោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងដោយមានការឯកភាពពីម្ចាស់ទីតាំង កម្លាំងជំនាញបានធ្វើការត្រួតពិនិត្យឆែកឆេរ នៅទីតាំងខាងលើនៅចំពោះមុខសមត្ថកិច្ចចម្រុះ ពាក់ព័ន្ធករណីសង្ស័យនាំចូលស្តុកចែកចាយផលិតផលគ្រឿងសម្អាងរំលោភកម្មសិទ្ធិបញ្ញា និងផលិតផលខុសច្បាប់ជាច្រើនប្រភេទ។

សមត្ថកិច្ចបានត្រួតពិនិត្យទីតាំងផ្ទះលេខ១២B ដោយបានរកឃើញសម្ភារ វត្ថុតាងមួយចំនួនដូចជា សាប៊ូចំនួន១,០៤០កេស ស្មើនឹង១១,១១២គីឡូក្រាម, ច្រាស់ដុះធ្មេញ ចំនួន៣,៥០០គីឡូក្រាម និងគ្រឿងសម្អាងចម្រុះចំនួន ៤៨០គីឡូក្រាម។

ក្រោយត្រួតពិនិត្យសមត្ថកិច្ចរកឃើញថា ផលិតផលមួយចំនួនក្លែងម៉ាកសញ្ញា ក្លែងបន្លំប្រភពផលិត និងពុំមានលេខប្រវេទ៍ត្រឹមត្រូវ ដូចនេះសមត្ថកិច្ចចម្រុះសម្រេចដកហូត ជាបណ្តោះអាសន្ន ដោយដាក់ចូលក្នុងបន្ទប់ជាន់ផ្ទាល់ដី និងជាន់ឡៅតឿ នៃទីតាំងផ្ទះលេខ១២B ផ្លូវ៣២៨ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

ចំពោះវត្ថុតាងផ្សេងទៀត ជាទំនិញដែលគ្មានលេខប្រវេទ៍ពីក្រសួងសុខាភិបាល ដូចនេះសមត្ថកិច្ចចម្រុះសម្រេចធ្វើការឃាត់ទុក និងដកហូតជាបណ្តោះអាសន្ន ដោយប្រគល់ឲ្យម្ចាស់ទីតាំងធ្វើការគ្រប់គ្រង មិនឲ្យបាត់បង់ ឬខូចទ្រង់ទ្រាយដើម ដើម្បីធ្វើការស្រាវជ្រាវ ពិនិត្យបន្តរងចាំកាសម្រេចពីស្ថាប័នតុលាការ។

បន្ថែមពីនេះ សមត្ថកិច្ចចម្រុះបានដកហូតប៉ាន់គំរូក្នុងមួយមុខ ០២ដប ឬ០២ដុំ ដើម្បីធ្វើការពិនិត្យ។ ដោយឡែក ចំពោះម្ចាស់ទីតាំង ឈ្មោះ មឿន សុខស៊ីថា ត្រូវបានអញ្ជើញទៅបំភ្លឺនៅនាយកដ្ឋានប្រឆាំងបទល្មើសសេដ្ឋកិច្ច ដើម្បីបន្តនីតិវិធី៕

(សូមអានបន្ត)

ចិននឹងបាញ់បង្ហោះផ្កាយរណបពិសេស ២គ្រឿងទៀត ឡើងទៅកាន់ទីអវកាសនៅឆ្នាំ២០២១

(ប៉េកាំង)៖ ទីភ្នាក់ងារព័ត៌មានចិនស៊ីនហួរ នៅរសៀលថ្ងៃពុធ ទី០៥ ខែសីហា ឆ្នាំ២០២០ នេះបានឱ្យដឹងថា រដ្ឋាភិបាលចិនមានផែនការបាញ់បង្ហោះ ផ្កាយរណបឧតុនិយម ០២គ្រឿង បន្ថែមទៀត ឡើងទៅកាន់ទីអវកាសនៅឆ្នាំ២០២១ខាងមុខ។

ផ្អែកលើប្រភពដែលខ្លួនទទួលបានក្រុមហ៊ុនបច្ចេកវិទ្យា វិទ្យាសាស្ត្រ និងអវកាសចិន (China Aerospace Science and Technology Corporation) ទីភ្នាក់ងារព័ត៌មានស៊ីនហួរ បានបញ្ជាក់ទៀតថា ផ្កាយរណបមួយក្នុងចំណោមពីរគ្រឿងខាងលើ ដែលគ្រោងនឹងត្រូវបាញ់បង្ហោះ មានឈ្មោះថា ហ្វឹងយុន 3E (Fengyun-3E ឬ FY-3E)។ ផ្កាយរណបនេះនឹងក្លាយជាសមាជិកទី ៥ នៃក្រុមផ្កាយរណប Fengyun-3 នៅក្នុងគន្លងគោចរពីលើប៉ូលផែនដី និងជាផ្កាយរណបឧតុនិយម ដំបូងគេរបស់ពិភពលោក ស្ថិតនៅគន្លងគោចរប្រភេទនេះ (dawn-dusk orbit)។

ចំណែកឯ ផ្កាយរណបមួយទៀតឈ្មោះ Fengyun-4B (FY-4B) នឹងក្លាយជាផ្កាយរណបទី ២ នៃក្រុមផ្កាយរណប Fengyun-4។ ចិនបានបាញ់បង្ហោះផ្កាយរណប Fengyun-4 ទៅកាន់ទីអវកាស កាលពីខែធ្នូ ឆ្នាំ២០១៦។ FY-4B នឹងធ្វើឱ្យមានភាពប្រសើរឡើង នូវផ្កាយរណបឧតុនិយមចិន នៅក្នុងគន្លងតាមភូមិសាស្ត្រ ហើយមកទល់នឹងពេលនេះ ចិនបានបង្ហោះផ្កាយរណបឧតុនិយម Fengyun សរុប ១៧គ្រឿងហើយ៕

(សូមអានបន្ត)